विराटनगर। महेन्द्र चोकस्थित ऐतिहासिक तथा सांस्कृतिक पहिचान संरक्षण गर्ने उद्देश्यसहित राजा महेन्द्रको शालिक पुनर्स्थापनाका लागि तदर्थ समिति गठन गरिएको छ।

स्थानीय स्तरमा बढ्दो चासो र ऐतिहासिक धरोहर जोगाउने अभियानलाई संस्थागत रूप दिन घनश्याम थापा मगरको संयोजकत्वमा “इतिहास तथा संस्कृति संरक्षण अभियान समूह” गठन गरिएको हो।

समितिले विराटनगरको पुरानो ऐतिहासिक स्वरूप, सांस्कृतिक पहिचान र सार्वजनिक स्मृतिलाई जोगाउँदै शालिक पुनर्स्थापनालाई प्राथमिकतामा राख्ने जनाएको छ।

समितिमा सभिना उप्रेती पोखरेल, निश्चल चन्द्र घिमिरे, मोहित लालवानी, संजय बाबु शर्मा, पशुपति साह, उत्तम दाहाल, विकल कार्की, रेवती रमण दाहाल र विक्रम कार्की सदस्य रहेका छन्।

सदस्यहरूले इतिहास संरक्षण केवल विगतको सम्झना मात्र नभई भावी पुस्ताका लागि पहिचान र प्रेरणाको आधार भएको बताएका छन्।

समितिले सबै राजनीतिक दल, सामाजिक संघ–संस्था तथा नगरवासीलाई साझा जिम्मेवारीका साथ अभियानमा सहभागी हुन आह्वान गरेको छ।

स्थानीय तहसँग समन्वय गर्दै ऐतिहासिक संरचनाको संरक्षण र पुनर्स्थापनाका लागि आवश्यक प्रक्रिया अघि बढाइने समितिले जनाएको छ।

यस अभियानलाई विराटनगरको सांस्कृतिक पहिचान मजबुत बनाउने र नगरको ऐतिहासिक गौरव पुनः स्थापित गर्ने महत्वपूर्ण पहलका रूपमा लिइएको छ।