मोरङ, पुस २५ - मोरङका प्रमुख जिल्ला अधिकारी (सिडियो) प्रेमप्रसाद भट्टराईलाई गृह मन्त्रालयले फिर्ता बोलाएको छ। २०८० पुस २ देखि २०८१ पुस २३ सम्म मोरङमा सिडियोको रूपमा कार्यभार सम्हालिरहेका भट्टराईले आफ्नो कार्यकालमा कुशल प्रशासनिक क्षमता प्रदर्शन गर्दै सेवाग्राहीहरूको विश्वास जित्न सफल भएका थिए।

भट्टराईको कार्यकालमा सेवा प्रवाहलाई व्यवस्थित बनाउँदै, जिल्लाका प्रमुख समस्या समाधान गर्न उनले प्रभावकारी भूमिका निर्वाह गरेका थिए। स्थानीय नागरिक र सेवाग्राहीहरूले उनको कार्यसम्पादनको प्रशंसा गर्दै उनको विदाईलाई "सम्झनायोग्य" भनेका छन्।

उनको स्थानमा इन्द्रदेव यादवलाई मोरङको प्रमुख जिल्ला अधिकारीको रूपमा नियुक्त गरिएको छ। यादवले बुधबारदेखि औपचारिक रूपमा मोरङमा जिम्मेवारी सम्हालेका छन्। यसअघि यादवले रौतहट, सर्लाही, सुनसरी, इलाम, र चितवनमा प्रमुख जिल्ला अधिकारीका रूपमा ५२ महिना सेवा गरिसकेका छन्।

विराट व्यापार संघ विराटनगरले बिहीबार प्रमुख जिल्ला अधिकारी यादवको स्वागत गर्दै फूलमाला र खादा ओढाएर सम्मान गरेको छ। संघका अध्यक्ष अंशु बन्जाराको नेतृत्वमा आयोजित सम्मान कार्यक्रममा संघका अन्य पदाधिकारीहरूको उपस्थिति रहेको थियो।

यस परिवर्तनले मोरङमा प्रशासनिक जिम्मेवारी थप प्रभावकारी बनाउने अपेक्षा गरिएको छ। नयाँ सिडियो यादवले आफ्नो अनुभव र कौशलबाट जिल्लामा शान्ति सुरक्षा, सेवा प्रवाह, र प्रशासनिक सुधारका लागि योगदान पुर्याउने विश्वास गरिएको छ।