विराटनगर - नेपालकै पहिलो लायन्स क्लबका रूपमा परिचित लायन्स क्लब अफ विराटनगरले लायन्स वर्ष २०२६/२७ का लागि चाँद ईराकीलाई अध्यक्ष चयन गरेको छ। नयाँ नेतृत्वसँगै क्लबले सामाजिक सेवा, मानवीय सहायता तथा समुदाय विकासका कार्यक्रमलाई थप प्रभावकारी, व्यवस्थित र परिणाममुखी बनाउने लक्ष्य लिएको छ।

अध्यक्षमा चयन भएपछि ईराकीले शिक्षा, स्वास्थ्य, वातावरण संरक्षण, युवा सशक्तीकरण तथा मानवीय सेवाका क्षेत्रमा समुदायको आवश्यकता केन्द्रित कार्यक्रम सञ्चालन गरिने बताए। क्लबलाई पारदर्शी, उत्तरदायी र सक्रिय संस्थाका रूपमा अझ सुदृढ बनाउँदै स्थानीय तहसँग सहकार्यमा दीर्घकालीन प्रभाव पार्ने सामाजिक अभियान सञ्चालन गरिने उनको भनाइ छ।

उनका अनुसार आगामी कार्यकालमा निःशुल्क स्वास्थ्य शिविर, शैक्षिक सहयोग, रक्तदान, वातावरण संरक्षण, विपद् व्यवस्थापन, जनचेतनामूलक अभियान तथा समुदायसँग प्रत्यक्ष जोडिएका सामाजिक उत्तरदायित्वका कार्यक्रमलाई प्राथमिकताका साथ अघि बढाइनेछ। ‘लायन्सको मूल मर्म सेवा हो। त्यसलाई व्यवहारमा उतार्दै समाजलाई प्रत्यक्ष लाभ पुग्ने कार्यक्रम सञ्चालन गर्नु नै हाम्रो प्राथमिकता हुनेछ,’ ईराकीले बताए।

समाजसेवा र नेतृत्व विकासमा लामो समयदेखि सक्रिय ईराकीको नेतृत्वले क्लबको सेवामूलक अभियानलाई थप उचाइमा पुर्‍याउने विश्वास सदस्यहरूले व्यक्त गरेका छन्। नयाँ कार्यसमितिले संस्थागत सुशासन, प्रभावकारी सेवा प्रवाह र समुदायसँगको सहकार्यलाई समेत थप मजबुत बनाउने अपेक्षा गरिएको छ।

लायन्स क्लब अफ विराटनगर नेपालको लायन्स अभियानको ऐतिहासिक केन्द्रका रूपमा परिचित छ। यो नेपालकै पहिलो लायन्स क्लब हो, जसको स्थापना नेपालका पूर्व प्रधानमन्त्री मातृका प्रसाद कोइरालाको पहलमा विराटनगरमा भएको थियो। त्यसयता क्लबले शिक्षा, स्वास्थ्य, विपद् राहत, वातावरण संरक्षण र विभिन्न मानवीय सेवामूलक अभियान सञ्चालन गर्दै सामाजिक उत्तरदायित्वको क्षेत्रमा विशिष्ट पहिचान बनाउँदै आएको छ। नयाँ नेतृत्वसँगै उक्त विरासतलाई अझ सशक्त रूपमा अघि बढाउने अपेक्षा गरिएको छ।