विराटनगर : नेकपा एमाले मोरङको नयाँ नेतृत्व चयनका लागि हुनुपर्ने मतदान फेरि सरेको छ । पार्टीको १० औँ जिल्ला अधिवेशनमा नयाँ नेतृत्व चयनका लागि मङ्गलवार मतदान हुने भनिएको थियो । तर, मतदान बुधवार बिहानसम्मका लागि सरेको हो ।

मङ्गलवार बिहान ९ बजेबाट मतदान सुरु गर्ने भनिएको मतदान सहमतिको प्रयास गर्ने भन्दै पुनः दिउँसोका लागि सारियो । तर मतपत्र छपाइमा समय लाग्ने भन्दै निर्वाचन समितिले मतदानको समय पुनः सारेको हो । अब बुधवार बिहान ७ बजेबाट मतदान सुरु हुने प्रमुख निर्वाचन अधिकृत सुरेशलाल श्रेष्ठले जानकारी दिए ।

 पार्टीको जिल्ला अधिवेशन फागुन १७ गतेदेखि चलिरहेको छ । श्रेष्ठका अनुसार मतदानको समय बुधवार बिहान ७ बजेदेखि अपराह्न ४ बजेसम्मलाई तोकिएको छ । ५ जना पदाधिकारीसहित १ सय ६५ सदस्यीय जिल्ला समितिमा ७१ जना सदस्य सर्वसम्मत निर्वाचित भइसकेको श्रेष्ठले जानकारी दिए ।

 सुरुमा ३ सय २५ जनाले मनोनयन दर्ता गरेका थिए । तीमध्ये ६३ जनाले उम्मेदवारी फिर्ता लिएका छन् । चुनावी मैदानमा १ सय ९१ जना छन् ।

निर्वाचनमा १ पटकमा २० जनाले मतदान गर्न सक्ने व्यवस्था मिलाइएको श्रेष्ठको भनाइ छ । उम्मेदवार धेरै भएका कारण १ जना मतदातालाई भोट हाल्न १५ मिनेटसम्म समय लाग्ने अनुमान गरिएको छ । मतदान सम्पन्न भएपछि पार्टी कार्यालय पाञ्चालीमा मतगणना हुनेछ ।

अधिवेशनमा संस्थापन पक्षबाट अध्यक्षमा राजकुमार ओझा, उपाध्यक्षमा शान्ति लिम्बू भुजेल, सचिवमा रविन थापा, उपसचिवमा शिल्पा निराला कार्की र ईर्जालाल राजवंशीको उम्मेदवारी परेको छ । पार्टी अध्यक्ष केपी शर्मा ओली पक्षधरलाई संस्थापन भनिएको छ ।

इतर पक्षबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तता र उषा झाले उम्मेदवारी दिएका छन् । इतर पक्षको नेतृत्व नेता विनोद ढकालले गरिरहेका छन् । ढकाल पूर्व राष्ट्रपति विद्यादेवी भण्डारी पक्षधर हुन् । यद्यपि, भण्डारी सक्रिय राजनीतिमा आइसकेकी छैनन् ।

दुवै पक्ष पदाधिकारीदेखि सदस्यसम्म प्यानल बनाएर मैदानमा उत्रिएका छन् । अधिवेशनका लागि ९ सय ११ जना प्रतिनिधि छन् ।