काठमाडौं । नेपालमा आन्तरिक पर्यटन अर्थतन्त्रको महत्वपूर्ण आधारका रूपमा स्थापित हुँदै गएको देखिएको छ । आर्थिक वर्ष २०८१÷८२ मा आन्तरिक पर्यटनले देशको कुल गार्हस्थ्य उत्पादन (जीडीपी)मा २.६५ प्रतिशत योगदान पु¥याएको अनुमान गरिएको छ ।

राष्ट्रिय तथ्यांक कार्यालयले सार्वजनिक गरेको ‘आन्तरिक पर्यटन सर्वेक्षण २०८१÷८२’ अनुसार सो आर्थिक वर्षमा नेपालको कुल गार्हस्थ्य उत्पादन ५४ खर्ब ५४ अर्ब रुपैयाँ पुगेको थियो । त्यसमध्ये आन्तरिक पर्यटनबाट १ खर्ब ४४ अर्ब ४९ करोड रुपैयाँ बराबरको कुल मूल्य अभिवृद्धि भएको उल्लेख गरिएको छ, जुन कुल जीडीपीको २.६५ प्रतिशत हो ।

सर्वेक्षणअनुसार समीक्षा अवधिमा आन्तरिक पर्यटनमार्फत ४ खर्ब ७ अर्ब १७ करोड रुपैयाँ बराबरको पर्यटकीय उपभोग भएको छ । यसबाट ३ खर्ब ३१ अर्ब ८४ करोड रुपैयाँ बराबरको उत्पादन सिर्जना भएको अनुमान गरिएको छ ।

उत्पादन प्रक्रियामा प्रयोग भएका वस्तु तथा सेवाको लागत अर्थात् मध्यवर्ती उपभोग १ खर्ब ८७ अर्ब ३४ करोड रुपैयाँ रहेको सर्वेक्षणले देखाएको छ । उक्त लागत कटाउँदा आन्तरिक पर्यटनबाट सिर्जित कुल मूल्य अभिवृद्धि १ खर्ब ४४ अर्ब ४९ करोड रुपैयाँ पुगेको हो ।

राष्ट्रिय तथ्यांक कार्यालयले ४ खर्ब रुपैयाँभन्दा बढीको पर्यटकीय उपभोग तथा जीडीपीमा २.६५ प्रतिशत योगदानले आन्तरिक पर्यटन नेपालको अर्थतन्त्रमा उल्लेखनीय भूमिका खेल्दै गएको निष्कर्ष निकालेको छ । पछिल्ला वर्षहरूमा आन्तरिक यात्राको विस्तार, धार्मिक, सांस्कृतिक तथा मनोरञ्जनात्मक गन्तव्यप्रतिको आकर्षण र पर्यटनसम्बन्धी सेवाको बढ्दो प्रयोगले आन्तरिक पर्यटनको आर्थिक योगदान निरन्तर बढ्दै गएको संकेत सर्वेक्षणले गरेको छ ।