विराटनगर– विराट गोल्डकप फुटवल ट्रष्टले ‘विराटनगरको साथ, फुटवलको विकास’ मूल नाराका साथ नवौं संस्करणको रात्रिकालिन विराट गोल्डकप फुटवल प्रतियोगिता २०८१ फाल्गुन १९ गतेदेखि २८ गतेसम्म विराटनगरस्थित सिहद रंगशालामा आयोजना गर्ने भएको छ ।

 विराट गोल्डकप फुटवल प्रतियोगितामा १० वटा फुटवल टिमले प्रतिस्पर्धा गर्नेछन । जसमा भारतीय टिम साउथर्न समिति फुटवल क्लव र सुदेभा दिल्ली फुटवल क्लवका साथै नेपालका विभागी टिमहरु थ्रि स्टार फुटवल क्लव, नेपाल पुलिस क्लव, त्रिभुवन आर्मी फुटवल क्लव, मच्छिन्द्र फुटवल क्लव, एन आरटी क्लव, नेपाल एपीएफ फुटवल क्लव, चर्च ब्वाइज फुटवल क्लव र रिजालको मोरङ एफसीको सहभागिता रहने छ भने खेल १० दिन सम्म आयोजना हुनेछ । 

 १ करोड ३५ लाखको लागतमा आयोजना हुने  नवौं संस्करणको रात्रिकालिन विराट गोल्डकप फुटवल प्रतियोगिताको विजेताले ११ लाख नगद र शिल्ड प्राप्त गर्नेछन । 

त्यस्तै  उपविजेताले ५ लाख र कप प्राप्त गर्नेछन भने  सर्वोत्कृष्ट खेलाडीले नगद ५१ हजार, उत्कृष्ट प्रशिक्षकले १५ हजार, सर्वाधिक गोलकर्ताले १५ हजार, उत्कृष्ट गोलरक्षकले  १५ हजार र दैनिक हुने खेलका उत्कृष्ट खेलाडीले  ११ हजार पुरस्कार पाउनेछन ।  

पाँच हजार दर्शक क्षमता रहेको सहिद रंगशालामा राती समेत खेल संचालन हुनेछन भने  प्रतियोगिता हेर्न आउने दर्शकहरुमध्येबाट प्रत्येक दिन ५/५ जनालाई ‘फेस अफ द विराट गोल्डकप’ चयन गरिनुका  साथै राष्ट्रिय कलाकारहरुको सहभागितामा सांस्कृतिक कार्यक्रम गरी प्रतियोगिताको उद्घाटन खेलको सुरु हुने प्रतियोगिताका  संयोजक नबिन रिजालले जानकारी दिए  । उनले प्रत्येक दिन खेल हेर्ने दर्शकले दुई सयको टिकट लिनुपर्ने तर यो सिजनभरि १० दिनका लागि एकैपटक टिकट लिनेलाई एक हजार सात सय ५० रुपैयाँ मात्रै लाग्ने पत्रकार सम्मेलनमा जानकारी दिए ।

पत्रकार सम्मेलन पश्चात्  स्थानीय उद्योगी व्यवसायी, पत्रकार, कर्मचारी र सुरक्षाकर्मी टिमबीच मैत्रीपूर्ण फुटवल प्रतियोगिता भएको थियो ।

विराट गोल्डकप फुटवल प्रतियोगिताको संरक्षक र प्राविधिक सहयोगमा कोशी प्रदेश सरकार, प्रदेश खेलकुद विकास वोर्ड, विराटनगर महानगरपालिका, राष्ट्रिय खेलकुद परिषद्, अखिल नेपाल फुटवल संघ र मोरङ उद्योग व्यापार संघ रहेको आयोजकले जानकारी दिएको छ ।