नेकपा एमाले मोरङ जिल्लाको अधिवेशनको मिति नजिकिँदै जाँदा विभिन्न पदका लागि आकांक्षा राख्नेहरूको संख्या बढ्दै गएको छ । पार्टीको जिल्ला अध्यक्षका लागि वर्तमान जिल्ला संगठन कमिटीका अध्यक्ष बाबुराम कार्की, अजम्बर राई, राजकुमार ओझा, सागर थापा, कृष्ण बस्नेत पर्शुराम, महेश भट्टराईहरूको नाम चर्चामा रहँदा सचिव पदका लागि पनि उसैगरी आकांक्षी हरुको नाम चर्चा छ । वर्तमान सचिव रबिन थापा, उपसचिव सोमराज थापा, वर्तमान प्रचार तथा प्रकाशन विभाग प्रमुख सन्तोष वान्तवा र रिता न्यौपाने लगायतको नाम चर्चामा छ । यसरी आएका नामहरु मध्ये रिता न्यौपानेले सचिव पदमा आफ्नो सशक्त दाबेदारी रहने बताउँदै आउनुभएको छ । उनै न्यौपानेसँग गरिएको संक्षिप्त कुराकानी :

जिल्ला अधिवेशनमा तपाईले आफ्नो उम्मेदवारी सचिव पदमा रहने बताउँदै आउनुभएको छ । यो कायम रहन्छ ?

अवश्य रहन्छ । मैले आजदेखि हैन अघिल्लै पटक जिल्ला सदस्य भइरहँदा अर्को पटक सचिव पदको उम्मेदवार बन्ने भनिसकेको थिएँ । र मेरो तयारी पनि सोहि पदका लागि छ । पार्टी भित्र देखिएका केहि समस्याहरुलाई पनि हल गरेर अघि बढ्नुपर्छ भन्ने उद्देश्यका साथ मैले पार्टीलाई एकताबद्ध बनाएर मोरङ जिल्लामा राजनैतिक नेतृत्व नेकपा एमालेले गर्छ भन्ने पुष्टि गर्नका लागि पनि मेरो तयारी हो । 

तयारी चाँही के–के गर्नुभयो ? 

मैले नेकपा एमालेका नेता कार्यकर्ताको भावना बुझ्ने प्रयत्न गरेको छु । पार्टीभित्रका समस्यालाई नजिकबाट बुझेको छु । पार्टीको मूल स्प्रिटलाई बुझेको छु । पार्टीले लिएको समृद्ध नेपाल सुखी नेपालीको राष्ट्रिय आकांक्षा र मिसन ८४ लाई राम्रोसँग बुझेर सोहि अनुसार सचिव पदमा निर्वाचित भए गर्नुपर्ने योजनाहरु समेत तयार गरेकी छु । 

यो तयारीले पुग्छ र ? अहिले त एउटा समूहको नेताको आशिर्वाद चाहिन्छ भन्छन् नि । कतैबाट पाउनुभयो ?
 
हाहाहा.... त्यस्तो हुदैँ होइन । अहिले नेकपा एमाले भित्र कुनै गुट छैन । कुनैबेला गुटबन्दीमा लागेका नेताहरु अहिले अर्कै पार्टीतिर लागि सक्नुभएको छ । हो, लोकतान्त्रिक पद्धतिलाई आत्मसाथ गरेको पार्टीभित्र कहिलेकाँही आन्तरिक प्रतिष्पर्धा हुन्छ । त्यसैलाई हेरेर नेकपा एमालेभित्र गुट छ भन्न मिल्छ र रु समान क्षमता र योगदान भएका नेताहरु बिच आन्तरिक प्रतिष्पर्धामा आ–आफ्नो शक्ति प्रदर्शन हुनु स्वभाविक हो । त्यसैलाई आधार मानेर गुटबन्दी भन्ने हुदैन । नेकपा एमाले पार्टी भनेकै नेपाली जनताको सबैभन्दा प्रिय पार्टी हो । यहाँभित्र क्षमतावान लिडरहरूको कमि छैन, त्यसैले नेतृत्व चयनमा प्रतिष्पर्धा हुनु स्वभाविक हो । आशीर्वादका भरमा पदमा जाने हैन । आफ्नो योग्यता क्षमतालाई पार्टी काममा जिम्मेवारीपूर्वक पूरा गरेर नेता कार्यकर्ताको मन जितेर नेतृत्वमा पुग्ने हो ।

तपाईंले गुट छैन भने पनि संस्थापन पक्ष र संस्थापन इतर पक्ष भनिन्छ नि तपाईले चाँही कसलाई रोज्ने हो ?
 
मैले अघि पनि भनिसकेँ । नेकपा एमाले सिङ्गो एउटै छ । कताको संस्थापन र इतर पक्ष हुनु ? छैन । यो नेकपा एमालेको शक्ति केहि क्षीण भइहाल्छ कि भन्ने दिवास्वप्न देख्नेहरूको हौवा मात्र हो । नेकपा एमाले शक्तिशाली भयो । जनताको प्रिय पार्टी भयो । नेकपा एमालेले नेतृत्व गरिरहँदा विकासको लहर आउँछ । जनताको मन जित्छ भन्ने भयले त्रसिदहरुले नेकपा एमालेका हरेक तहमा खेल्न प्रयोग गरिएको भाषा मात्र हो । जहाँसम्म कसलाई रोज्ने भन्ने तपाईको प्रश्न छ त्यो नै गलत छ । म नेकपा एमालेको कार्यकर्ता हो नेकपा एमालेलाई रोज्ने हो बस । 

निर्वाचनमा दुईवटा प्यानल बनाएरै भिडन्त हुन्छ भन्ने सुनिन्छ नि ?

मलाई लाग्दैन प्यानलको भिडन्त हुन्छ । केहि पदहरुमा समान क्षमता र योगदान भएका नेताहरु बिच प्रतिष्पर्धा हुन सक्छ । त्यसलाई हेरेर प्यानलको भिडन्त भन्ने हुदैन । 

तपाई एउटा शिक्षण संस्था सञ्चालन गरिरहेको ब्यक्ति हुनुहुन्छ । पार्टीलाई पर्याप्त समय दिन सक्नुहुन्छ ?

पार्टीलाई  समय दिन नसक्ने हुँदा मैले इच्छा ब्यक्त गर्नु नै गलत हुन्छ । पार्टीलाई समय दिने, जनताको कुरा सुन्ने, जनताका आकांक्षाहरु सार्थक बनाउन साधक बन्ने भन्ने उद्देश्य राखेर नै सचिव पदको उम्मेदवार बन्न खोजेको हो । जहाँसम्म विद्यालय सञ्चालनको कुरा गर्नुभयो त्यो मेरो सेवासहित आफ्नो जीवन धान्ने कर्म पनि हो । त्यसलाई कसरी व्यवस्थित गर्ने वा विद्यालयको व्यवस्थापन कसरी गर्नुपर्छ भन्ने मलाई राम्रो सँग थाहा छ । 

पार्टीमा तपाईको योगदान कति हो र ? तपाईलाई सचिवमा जिताउन ?

यो साह्रै राम्रो प्रश्न गर्नुभयो । नेतृत्वमा जानका लागि पार्टीभित्रको योगदान अत्यन्त महत्वपूर्ण हुन्छ । तर कहिलेकाँही थोरै कम योगदान गरेको ब्यक्ति नेता र अलि बढी योगदान गरेको ब्यक्ति बाहिर पनि हुनसक्छ । यसमा पार्टीभित्रको योगदानसँगै ब्यक्ति भित्र अन्तरनिहीत अन्य क्षमताहरुले पनि काम गर्छ । सबैसँग कोर्डिनेशन गर्न सक्ने, आफ्ना बिचार प्रष्ट राख्न सक्ने लगायतका क्षमता हुँदा पनि थोरै अघिपछि हुन सक्छ । जहाँसम्म मेरो योगदान को कुरा गर्नुभयो । म २०५१ सालमा महेन्द्र मोरङ क्याम्पसमा अखिलको प्रारम्भिक कमिटीको सदस्य भएर सक्रिय राजनीतिमा लागेकी हुँ । पार्टीको संगठित सदस्य भने २०६४ सालमा मात्र प्राप्त भयो । त्यसपछि म नेकपा एमाले टंकीसिनुवारी गाउँपालिकाको पार्टी सदस्य भएँ । २०७४ सालमा म पार्टीको तर्फबाट बुढीगंगा गाउँपालिकाको उपाध्यक्षको उम्मेदवार बनेँ । २०७४ सालदेखि हालसम्म नेकपा एमाले मोरङको जिल्ला कमिटी सदस्यको जिम्मेवारीमा छु । यहि बिचमा २०७९ मा मोरङ क्षेत्र नं. ६ ‘क’ को प्रदेश सभा सदस्यको उम्मेदवार बनेँ। पार्टीको जनसंगठन अनेमसंघमा पनि निरन्तर आवद्ध छु । अनेमसंघ जिल्ला सदस्य हुँदै अहिले सचिव छु । यो बिचमा बुढीगंगा गाउँपालिकाका पार्टीको तर्फबाट इन्चार्जको भूमिका निर्वाह गरेँ। यस्तै अन्य विभिन्न सामाजिक क्षेत्रमा पनि आवद्ध रहेको यहाँहरुलाई अवगत नै छ ।