विराटनगर, शनिबार – विराटनगर महानगर समितिको आयोजनामा तेली कल्याण समाज नेपालले होली मिलन तथा शुभकामना आदान–प्रदान कार्यक्रम भव्य रूपमा सम्पन्न गरेको छ। समाजका महानगर अध्यक्ष सञ्जय कुमार साहको अध्यक्षतामा सम्पन्न उक्त कार्यक्रम निर्धारित समयभन्दा एक घण्टा ढिलो सुरु भए पनि उल्लासमय वातावरणमा सम्पन्न भएको थियो।

कार्यक्रममा विराटनगरमा बसोबास गर्ने करिब २०० जना तेली समुदायका महिला तथा पुरुषहरूको उल्लेखनीय उपस्थिति रहेको समाजका सचिव जगतलाल साहले जानकारी दिए।

कार्यक्रमको पहिलो चरणमा अतिथिहरूबाट औपचारिक शुभकामना आदान–प्रदान गरिएको थियो भने दोस्रो चरणमा होली विशेष कार्यक्रमअन्तर्गत परम्परागत मालपुवा खाँदै रङगहरू साटासाट गर्दै आपसी सद्भाव र मित्रताको सन्देश प्रवाह गरिएको थियो।

कार्यक्रमका प्रमुख अतिथि समाजका जिल्ला अध्यक्ष डा. बालकृष्ण साह रहनुभएको थियो। त्यस्तै, विशेष अतिथिहरूका रूपमा गढी गाउँपालिकाकी उपमेयर अनिता कुमारी साह, पूर्व मुख्यमन्त्रीका प्रेस सल्लाहकार तथा वरिष्ठ पत्रकार देव नारायण साह, मैथिली एशोसिएसन नेपालका अध्यक्ष प्रविण नारायण चौधरी, उपाध्यक्ष पंकज वर्मा, अभा फाउन्डेसनका संस्थापक अभा अनुपना लगायत समाजका जिल्ला पदाधिकारी तथा सल्लाहकारहरूको बाक्लो उपस्थिति रहेको थियो।

कार्यक्रमले समुदायभित्र आपसी सम्बन्ध सुदृढ बनाउने, संस्कृतिको जगेर्ना गर्ने तथा सामाजिक एकता अभिवृद्धि गर्ने उद्देश्य राखेको आयोजक समितिले जनाएको छ। सहभागीहरूले परम्परागत ढंगले होली मनाउँदै सामाजिक सञ्जालमा समेत रमाइलो क्षणहरू साझा गरेका थिए।

कार्यक्रमको सफल आयोजना तथा व्यवस्थापनका लागि समाजका सम्पूर्ण पदाधिकारी, स्वयंसेवक र सहभागीहरूलाई धन्यवाद व्यक्त गर्दै अध्यक्ष सञ्जय कुमार साहले आगामी दिनमा पनि यस्ता कार्यक्रमहरूलाई निरन्तरता दिने प्रतिबद्धता व्यक्त गर्नुभयो।