बुटवल । रुपन्देहीको तिलोत्तमा नगरपालिकामा निजीस्तरबाबट बनिरहेको एक्स्ट्राटेक ओभल क्रिकेट स्टेडियममा फ्लड लाइट जडानको काम सम्पन्न भएको छ । स्टेडियमका प्रबन्ध निर्देशक विनोद कुँवरले मैदानमा ५ वटा फ्लडलाइट जडान गरिएको जानकारी दिए । 

 नेपालको कुनैपनि क्रिकेट मैदानमा फ्लड लाइट हालिएको यो पहिलोपटक हो ।  मंगलवादेखि लाइट टेस्टिङ (परीक्षण)को काम सुरु भएको कुँवरले जानकारी दिए । 'लाइट टेस्टिङ गर्दैछौं, परीक्षण सकिएपछि डे नाईट गेम गराउन सकिनेछ । कुँवरले भने, योजना अनुसारनै सबै काम भैरहेको छ । नेपाली क्रिकेट जगतमा पहिलो पटक यस्तो काम गर्न पाएकोमा निकै खुशी पनि लागेको छ ।'  

आजदेखि शुरु गर्ने भनिएपनि जेनेरेटर नआएकोले ढिलो भएको र मंगलवारदेखि परिक्षण शुरु हुने कुँवरले जानकारी दिए ।एकातिर फ्लड लाईटको काम चलिरहेको छ भने अर्कोतिर अरु संरचनाका काम पनि भैरहेका छन् । नेट प्राक्टिसका लागि पनि पिच अन्तिम चरणमा रहेको स्टेडियमका निर्देशक सूर्य कुँवरले बताए ।

चार तलाको २ वटा भवन भीआईपी बक्स प्लेयर बक्स , चेञ्जिङ रुम र मिडिया बक्स निर्माण अन्तिम चरणमा पुगेको उनले बताए । २५ हजार दर्शक क्षमताको प्यारापिटसहित परियोजनाको ५० प्रतिशत बढी वित्तीय प्रगति भइसकेको कुँवरले बताए । ५ वर्षमा पूरा गर्ने लक्ष्य रहेकोमा अब २ वर्षभित्र सबै काम सम्पन्न हुने उनले बताए । 

२०८० साल जेठ २९ गते शिलान्यास भई ०८० फागुनमै खेल्न योग्य मैदान तयार भएर फागुन २८ मा मैदानको उद्घाटनसहित लिजेण्ड्स कप क्रिकेट प्रतियोगिता आयोजना भएको थियो ।

यो मैदानमा गत वर्षको फागुनयता एक सय भन्दा बढी खेल भइसकेका छन् । नेपालको १९ वर्ष मुनिको विश्वकप खेलेको महिला टोली र नेपाल प्रिमियर लिग टिम लुम्बिनी लायन्सले यो मैदानमा अभ्यास गरेको थियो ।