सरकारले  पत्रकार अखण्ड भण्डारीलाई नेपाली पत्रकारिताको ऐतिहासिक संस्था गोरखापत्र संस्थानको अध्यक्षमा नियुक्त गरेको छ। भोजपुरको एक सामान्य गाउँमा जन्मेर झापा हुँदै विराटनगरबाट  पत्रकारिता यात्रा सुरु गरेका भण्डारी भाषामा गहिरो दखल, समाचारप्रतिको इमानदारी र पेशागत निष्ठाका कारण यो जिम्मेवारीमा पुगेका हुन्।

स्वभावमा सरलता, बोलीमा मिठास र हँसिलो अनुहार, अखण्ड भण्डारीलाई नजिकबाट चिनेका जोकोहीका लागि यी विशेषता अपरिचित छैनन्।

तर उनलाई अलग बनाउने मुख्य पक्ष भनेको भाषाप्रतिको गहिरो पकड र पत्रकारिताप्रतिको निरन्तर प्रतिबद्धता हो। गोरखापत्र संस्थानको नेतृत्वसम्म पुग्नु कुनै आकस्मिक उपलब्धि होइन, यो निरन्तर अभ्यास, अध्ययन र संघर्षको प्रतिफल हो।

पत्रकारितामा उनको प्रवेश साधारण थियो। पुष्पाञ्जली र सन्देश पत्रिकामा सामान्य रिपोर्टरका रूपमा काम गर्दै उनले समाचार संकलन, स्रोत व्यवस्थापन र भाषाको शुद्ध प्रयोग सिके। सुरुवाती दिनमै उनले बुझिसकेका थिए।समाचारको आत्मा तथ्य हो, तर त्यसलाई पाठकसम्म पुर्‍याउने शक्ति भाषा हो। यही बुझाइले उनलाई क्रमशः परिष्कृत पत्रकार बनाउँदै लग्यो।

विराटनगरबाट प्रकाशित एक समयको चर्चित चिरफार दैनिकको सम्पादक बनेपछि अखण्ड भण्डारीको पत्रकारितामा स्पष्ट धार देखियो। स्थानीय मुद्दालाई गम्भीरता र जिम्मेवारीका साथ उठाउने, शब्द चयनमा संवेदनशील रहने र समाचारलाई विचारको स्तरमा लैजाने उनको शैली पाठकमाझ स्थापित हुँदै गयो। यही कार्यशैलीले उनलाई राष्ट्रिय मिडियातर्फ डोर्‍यायो।

कान्तिपुर मिडिया समूहमा प्रवेशसँगै उनले डेस्क सम्पादकदेखि समाचार सम्पादकसम्मको जिम्मेवारी सम्हाले। समाचारको संरचना, शीर्षक चयन, भाषिक अनुशासन र सम्पादकीय मापदण्डमा उनले देखाएको पकड उल्लेखनीय रह्यो। उनका लागि समाचार केवल दैनिक सूचना होइन, समाजलाई सही दिशा दिने माध्यम थियो।

पछि अन्नपूर्ण पोस्टमा प्रधान सम्पादकको जिम्मेवारी सम्हाल्दै उनले सम्पादकीय नेतृत्व, संस्थागत संस्कार र युवा पत्रकार उत्पादनमा महत्वपूर्ण भूमिका खेले। केही दिनअघि मात्र अन्नपूर्ण पोस्टबाट बाहिरिएका भण्डारी अब सरकारको निर्णयअनुसार गोरखापत्र संस्थानको अध्यक्षको जिम्मेवारीमा छन्।

उनले पत्रकारिता सम्बन्धी ज्ञान दिनका लागि ‘समाचारको भाषा’ जस्ता पुस्तकहरू लेखेका छन् भने, साहित्यतर्फ उनको सिर्जना ‘बोरा’ जस्ता कृतिहरूमा पनि देख्न सकिन्छ। यसरी उनी कयौँ पुस्तकहरूको माध्यमबाट पत्रकारिता र साहित्य दुवै क्षेत्रमा योगदान पुर्‍याउँदै आएका छन्।

सामान्य संवाददाताबाट गोरखापत्र संस्थानको नेतृत्वसम्मको अखण्ड भण्डारीको यात्रा आजका युवाहरूका लागि प्रेरणा बन्न सक्छ ।
सुरुवात सानो हुन सक्छ, तर दृष्टि ठूलो हुनुपर्छ।

भाषामा दखल, निरन्तर अध्ययन, अनुशासन र इमानदार मेहनतले नेपाली पत्रकारितामा अझै पनि उचाइ हासिल गर्न सकिन्छ।
अखण्ड भण्डारीको यात्राले प्रमाणित गर्छ कि पत्रकारिता केवल पेशा होइन, यो समाजसँगको जिम्मेवार संवाद हो, र त्यो संवाद प्रभावकारी बनाउन भाषाको शक्ति अपरिहार्य हुन्छ।

भणडारीको कार्यकालमा गोरखापत्रले नयाँ उचाइ प्राप्त गरोस । अखवारका कुराको तर्फबाट शुभकामना ।