विराटनगर   : राजनीतिक अस्थिरताका कारण प्रदेश सभाले गति लिन नसकेको कोशी प्रदेशका मुख्यमन्त्री हिक्मतकुमार कार्कीले बताएका छन् ।

विराटनगरस्थित मुख्यमन्त्री तथा मन्त्रीपरिषद्को कार्यालयमा बुधबार आयोजित संघीयता कार्यान्वयन तथा कानून निर्माण सम्बन्धी सुझाव अध्ययन कार्यदलको प्रतिवेदन बुझदै मुख्यमन्त्री कार्कीले २०७९ सालको निर्वाचनपछिको राजनीतिक अवस्थाका कारण प्रदेश सभाहरु नै राम्ररी चल्न नसकेको प्रस्टयाए । 

उनले भने, ‘प्रदेश सभाको पहिलो कार्यकाल भरमार चलाएका थियौं । त्यसबेला आन्तरिक मामिला तथा कानून मन्त्रालयको नेतृत्व गरिरहदाँ हामी सबै ब्यस्त नै थियौं । अहिले त्यसको तुलनामा एकछेउ पनि पुग्न सकेका छैनौ ।’
 
यद्धपी, पछिल्लोसमय राजनीतिक स्थायित्वको चरण प्रारम्भ भएको बताउँदै मुख्यमन्त्री कार्कीले जनताले अहिलेपनि प्रदेशलाई नपत्याएको भएपनि एककिसिमको यात्रा अघि बढेको प्रस्टाए । उनले भने, ‘अहिले प्रदेश सभालाई लिएर मान्छेले ढुक्क हुने गरि पत्याएका छैनन् ।

तर एउटा यात्रा तय गरि सुरु भएको छ । जसका केही सकरात्मक सन्देश देखा पर्न थालेका छन् । केहीसमयपछि हिउँदे अधिवेशन सुरु हुनेछ । त्यसअघि, प्रदेशसभाका लागि पर्याप्त विजनेसको तयारी भइरहेको छ ।’