नेपाल पञ्चाङ्ग निर्णायक विकास समितिले यस वर्षको भाइटीकाको साइत सार्वजनिक गरेको छ । 

 कात्तिक १८ गते आइतबार बिहान ११ः ३७ बजे भाइटीकाको साइत शुभ रहेको समितिको आजको बैठकले निर्णय गरेको र  पश्चिम मोहडा गरेर भाइटीका लगाउनुपर्ने पनि समितिले जनाएको छ । नेवार समुदायले मनाउने किजापूजा पनि त्यसै दिन गर्नुपर्ने भएको छ । 

यस वर्षको यमपञ्चक अर्थात् नेपालीको दोस्रो ठूलो चाड तिहार कात्तिक १३ गते मङ्गलबार छ भने  मङ्गलबार धनत्रयोदशी (धनतेरस) पर्व मनाइन्छ 

यमदीपदान भने कात्तिक १४ गतेदेखि बुधबार  कागतिहार पनि बुधबार नै मनाउनुपर्ने तथा  आयुर्वेदका प्रवर्तक धन्वन्तरीजयन्ती पनि बुधबार नै मनाइनुपर्ने समितीले जनाएको छ । 

  कुकुर तिहार, नरक चतुर्दशी, दीपमालिका र लक्ष्मीपूजा पनि कात्तिक १५ गते बिहीबार परेको छ भने कात्तिक १६ गते शुक्रबार औँशी परेको र  त्यस दिन  तिहारको कुनै पर्व नपरेको समितिले आज जारी गरेको विज्ञप्तिमा उल्लेख गरिएको छ । 

 कात्तिक १७ गते शनिबार गाईगोरु पूजा, गोवर्द्धन पूजा, बलि पूजा, हलीतिहार, म्हपूजा र नेपाल संवत् ११४५ प्रारम्भ हुने दिन रहेको छ भने  कात्तिक २२ गते बिहीबार छठ पर्व परेको पनि समिति द्वारा जारी बिज्ञप्तिमा जनाइएको छ ।