हेटौंडा । हेटौंडा स्जिल्ला प्रहरी कार्यालय मकवानपुरले जिल्लामा क्रियाशील विभिन्न सञ्चारमाध्यममा आबद्ध सञ्चारकर्मीसँग परिचयात्मक तथा अन्तरक्रिया कार्यक्रम सम्पन्न गरेको छ ।

जिल्ला प्रहरी कार्यालय मकवानपुरको सभाहलमा आयोजित कार्यक्रममा कार्यालय प्रमुख प्रहरी उपरीक्षक (एसपी) श्यामबहादुर खत्रीको उपस्थितिमा सञ्चारकर्मीसँग परिचय आदानप्रदान गर्नुका साथै समसामयिक सुरक्षा, शान्ति व्यवस्था तथा अपराध नियन्त्रणसँग सम्बन्धित विषयमा छलफल गरिएको थियो ।

कार्यक्रमका क्रममा सञ्चारकर्मीहरूले उठाएका जिज्ञासा, सुझाव तथा प्रश्नहरूको एसपी खत्रीले जवाफ दिँदै प्रहरी र सञ्चार क्षेत्रबीचको सहकार्यलाई अझ प्रभावकारी बनाउन आवश्यक रहेको बताए । उनले सत्यतथ्य र जिम्मेवार समाचार सम्प्रेषणले समाजमा सकारात्मक सन्देश प्रवाह गर्न महत्वपूर्ण भूमिका खेल्ने उल्लेख गरे ।

एसपी खत्रीले मकवानपुरमा जुवा–तास, अवैध कारोबार तथा विभिन्न आपराधिक गतिविधिविरुद्ध प्रहरीले कडाइका साथ अभियान सञ्चालन गरिरहेको जानकारी दिए।

अपराध नियन्त्रण र शान्ति सुरक्षालाई प्रभावकारी बनाउने क्रममा केही स्वार्थ समूह तथा बिचौलियाहरू आत्तिएर प्रहरीविरुद्ध भ्रम फैलाउने प्रयास भइरहेको भए पनि कानुन कार्यान्वयनमा प्रहरी प्रतिबद्ध रहेको उनको भनाइ थियो ।

कार्यक्रममा जिल्लाभित्र कार्यरत विभिन्न सञ्चारमाध्यमका प्रतिनिधिहरूको सहभागिता रहेको थियो । जिल्ला प्रहरी कार्यालय मकवानपुरले आगामी दिनमा पनि सञ्चारकर्मीसँग निरन्तर समन्वय र सहकार्य गर्दै जाने जनाएको छ ।