धरान : १३औं धरान १०–के रन प्रतियोगिताको खुला उपाधि पुरुषतर्फ केन्याका धावक व्हिल्सन चेउलियोटले जितेका छन् भने महिलातर्फ केन्याकै शरन जेरोटिसले सफलता प्राप्त गरे।

“शिक्षाको निम्ति च्यारिटी दौड” नाराका साथ सम्पन्न यस दौडमा चेयुुलियोटले १० किलोमिटर दूरी ३० मिनेट ५५ सेकेन्डमा पुरा गरे भने जेरोटिसले ३८ मिनेट ४२ सेकेन्डमा दुरी पार गर्दै विजयी बने। करिब ४,७०० धावकहरूको सहभागिता रहेको यस दौडमा नेपालकै चर्चित गायकहरू राजु लामा र नरेन लिम्बुको पनि उपस्थिति थियो। 

पुरुषतर्फ केन्याका जुलियस मार्युकीले ३१ मिनेट ८ सेकेन्डमा दौड पूरा गर्दै दोस्रो स्थान हासिल गरे भने नेपालका दुर्गा बहादुर बुद्धले ३२ मिनेट ४४ सेकेन्डमा तेस्रो स्थान प्राप्त गरे। महिलातर्फ सुमित्रा कुमारी चौधरीले ३९ मिनेट २८ सेकेन्डमा दौड पूरा गर्दै दोस्रो स्थान हासिल गरिन् भने दिपा परियारले ३९ मिनेट ५९ सेकेन्डमा दौड पूरा गर्दै तेस्रो स्थान प्राप्त गरिन्। विजेताहरूलाई क्रमशः नगद ६० हजार, ४० हजार र ३० हजार रुपैयाँ पुरस्कार प्रदान गरियो। धरान उपमहानगरपालिकाका प्रमुख हर्कराज राईले विजेताहरूलाई पुरस्कार वितरण गरेका थिए। 

अण्डर १६ उमेर समूहमा पुरुषतर्फ इश्वर राई पहिलो, सुवास कुमार बि.के. दोस्रो र बिकी यादव तेस्रो स्थानमा रहे। महिलातर्फ जुही राई पहिलो, कुसुल राई दोस्रो र पूजा महतर तेस्रो स्थानमा रहे। भेट्रान पुरुषतर्फ विजय कुमार राई पहिलो, राकेश महर्जन दोस्रो र राम चन्द्र श्रेष्ठ तेस्रो स्थानमा आए। भेट्रान महिलातर्फ जमुना लिम्बु पहिलो, सपना राई दोस्रो र सम्झना राई तेस्रो स्थानमा रहिन्।

 सुपर भेट्रान पुरुषतर्फ विजय कृष्ण तामाङ पहिलो, विजय सागर दनुवार दोस्रो र शिव कुमार राई तेस्रो स्थानमा रहे भने सुपर भेट्रान महिलातर्फ जमुना त्रिखत्रि मोक्तान पहिलो, विष्णुमाया याक्खा वानेम दोस्रो र मनसा राई तेस्रो स्थानमा रहिन्। मिड भेट्रान पुरुषतर्फ धर्म महर्जन पहिलो, सुवर्ण सुब्बा दोस्रो र नाम्पर लेप्चा तेस्रो स्थानमा रहे भने मिड भेट्रान महिलातर्फ अनुदा तामाङ पहिलो, होमा देवी पुन दोस्रो र सान्ता वानेम तेस्रो स्थानमा रहे।

ह्वीलचेयरतर्फ पहिलो, दोस्रो र तेस्रो स्थान हासिल गर्ने खेलाडीहरूले क्रमशः ७ हजार, ५ हजार, र ३ हजार रुपैयाँ नगदसहित मेडल र प्रमाणपत्र प्राप्त गरे। सुपर भेट्रान विजेता तथा उपविजेताहरूले गिफ्ट भौचरसमेत प्राप्त गरेका थिए। प्रतियोगितामा सहभागीहरूलाई टाईमिङ चिप प्रविधि प्रयोग गरी दौडको समय मापन गरिएको थियो। धरान रनका अध्यक्ष रमु राईका अनुसार, दौडको सुरुवात विहान ७:३० बजे पुतली लाइनबाट भएको थियो र विभिन्न स्थान हुँदै भानुचोकमा समापन भएको थियो।