काठमाडौं ।
स्कटल्याण्डमा जारी आईसीसी क्रिकेट विश्वकप लिग २ अन्तर्गतको एकदिवसीय शृंखलामा नेपाल आज घरेलु टोली स्कटल्याण्डसँग भिड्दैछ।
खेल नेपाली समयअनुसार अपरान्ह ३:४५ बजे डुन्डीमा सुरु हुनेछ।

यो खेल नेपाल र स्कटल्याण्डबीचको शृंखलाको दोस्रो तथा नेपालको तेस्रो खेल हो। नेपाल यसअघि सोमबार स्कटल्याण्ड र बुधबार नेदरल्याण्ड्सविरुद्ध लगातार दुई शानदार जित निकालिसकेको छ। आजको खेलमा पनि नेपालको लक्ष्य जितको यो शृंखला कायम राख्ने हुनेछ।

स्कटल्याण्डसँग नेपाल अपराजित

नेपाल सन् २०२३ यता स्कटल्याण्डविरुद्ध अपराजित रहँदै आएको छ। पछिल्ला ५ खेलमध्ये ४ खेल नेपालले जितेको छ भने १ खेल वर्षाका कारण नतिजाविहीन भएको हो।
सन् २०२४ अक्टोबरमा अमेरिकाको डलासमा भएको लिग २ शृंखलामा नेपालले स्कटल्याण्डलाई एक खेलमा हराउँदा अर्को खेल वर्षाले प्रभावित भएको थियो।
त्यसअघि सन् २०२३ को फेब्रुअरीमा कीर्तिपुरमा भएका दुवै खेलमा नेपाल विजयी भएको थियो — क्रमशः २ विकेट र ३ विकेटको अन्तरले।

ऐतिहासिक तथ्यांक पनि नेपालको पक्षमा

ओडिआईमा हालसम्म नेपाल र स्कटल्याण्डबीच ९ खेल भएकोमा ५ खेल नेपालले जितेको छ। स्कटल्याण्डले ३ खेल जितेको छ भने १ खेल नतिजाविहीन रहँदै आएको छ।
पछिल्लो पटक स्कटल्याण्डले नेपाललाई सन् २०२२ को डिसेम्बरमा नामिबियामा हराएको थियो। त्यसयता स्कटल्याण्ड नेपालविरुद्ध लगातार हारको सामना गर्दै आएको छ।

अंकतालिकामा सुधार गर्दै नेपाल

यस शृंखलामा लगातार दुई जित हात पारेको नेपालले हालसम्म १४ खेलबाट १० अंक जोडेको छ र लिगको सातौं स्थानमा उक्लिएको छ।
यदि नेपाल आज पनि विजयी हुन सक्यो भने, यो लिगमा नेपालको स्थिति अझ सुदृढ हुने छ र विश्वकपको यात्रा थप बलियो बन्छ।