विराटनगर : माध्यमिक शिक्षा परीक्षा (एसईई)मा कोशी प्रदेशबाट ८० हजारभन्दा बढी परीक्षार्थी सहभागी हुँदैछन् ।

एसईईको पहिलो दिन आज (बिहीबार) अनिवार्य अंग्रेजी/संस्कृत/अरेविक/संस्कृत भाषा र साहित्यको परीक्षा रहेको छ । परीक्षा चैत १९ गतेसम्म संचालन हुनेछ ।


शिक्षा विकास निर्देशनालय धनकुटाका निर्देशक कृष्णप्रसाद पोखरेलले एसईई परीक्षा प्रभावकारी, व्यवस्थित, मर्यादित र पारदर्शी तवरले हुने जानकारी दिए ।

उनले परीक्षाको समयमा हुनसक्ने अनियमितता, जालसाजी, अव्यवस्थालाई न्यून गर्न र परीक्षार्थीलाई उचित हिसाबले परीक्षा दिने वातावरण बनाउन परीक्षासँग सम्बन्धित सरोकारवाला सबै क्रियाशिल भएर लागेको बताए । नीति तथा विधिमा रहँदै निष्पक्ष, पारदर्शी र व्यवस्थित परीक्षा प्रणालीको विकास भएको पोखरेलले प्रष्ट पारे ।

परीक्षाका लागि कोशी प्रदेश भर ३ सय ७१ वटा परीक्षा केन्द्र छन् । साधारण धार, प्राविधिक धार र खुला परीक्षार्थी गरी ८० हजार ९ सय ३४ जना विद्यार्थीले एसईईको परीक्षा दिँदै छन् । जसमध्ये साधारण धारको नियमिततर्फ ६९ हजार ५ सय ६ जना, ग्रेडवृद्धितर्फ ८ हजार ४ सय ५१ जना छन् ।

प्राविधिक धारको नियमिततर्फ २ हजार ७ सय ११ र ग्रेडवृद्धितर्फ २ सय ६६ जना छन् । खुला परीक्षार्थीको नियमिततर्फ ३ सय ९६ जना र ग्रेडवृद्धितर्फ ३० जना परीक्षार्थी रहेको शिक्षा विकास निर्देशनालय धनकुटाले जनाएको छ ।