काठमाडौं । आज पत्रकार तथा लेखक विपुल पोखरेलको ‘सङ्कल्पन’नामक पुस्तक सार्वजनिक गरिएको छ ।

मंगलबार काठमाडौंमा आयोजित एक कार्यक्रमकाबीच नेपालका पहिलो राष्ट्रपति रामवरण यादवको उपस्थितिमा ‘सङ्कल्पन’नामक पुस्तक विमोचन गरिएको हो ।

पुस्तक विमोचन पछि यादवले वर्तमान समयलाई डिजिटल युगको रूपमा व्याख्या गर्दै नेपालमा आएको ठूलो राजनीतिक परिवर्तनलाई आत्मसाथ गर्नुपर्ने आवश्यकता औंल्याए ।

उनले भने, ‘आज हामी अर्को युगमा छौं, डिजिटल युगमा प्रवेश गरिसकेका छौं। यति ठूलो परिवर्तन आएको छ। लामो समयपछि नेपालमा कुनै एक दलले फेरि दुई तिहाइ बहुमत प्राप्त गरेको छ। म शुभकामना दिन चाहन्छु, तर यो दुई तिहाइ बहुमत विगतमा जस्तै खेर नजाओस्।’

यादवले जनताले ल्याएको परिवर्तनलाई सम्मानपूर्वक स्वीकार गर्नुपर्नेमा जोड दिँदै सबै राजनीतिक दलले सहकार्य गर्नुपर्ने बताए ।

आफ्नो पार्टी पराजित हुँदा दुःख लाग्ने स्वाभाविक भए पनि समग्र परिवर्तनलाई आत्मसाथ गर्नु आवश्यक रहेको उनको भनाइ थियो । ‘आफ्नो पार्टीले हार्दा मन त दुख्छ । तर यो परिवर्तनमा सबैले आत्मासाथ गर्नुपर्छ । यो नेपालीको लागि, लोकतन्त्रको लागि, संघीयता समावेशीको लागि, समानुपातिकको लागि, धर्मनिरपेक्षताको लागि जुन संविधान ल्याएको छौं । अहिले निर्वाचित भएर आएकोहरुले देश बनाउको लागि यो संविधानलाई रक्षार्थ पालना गरेर अगाडि बढ्नुपर्छ । त्यो भित्र सारा कुरा छ । विधिको शासन अनुसार अगाडि बढ्न उहाँहरुलाई शुभकामना छ ।’

उनले वर्तमान संविधानको महत्व उल्लेख गर्दै लोकतन्त्र, संघीयता, समावेशिता, समानुपातिक प्रतिनिधित्व तथा धर्मनिरपेक्षताको संरक्षण गर्नुपर्ने बताए।

साथै, निर्वाचित प्रतिनिधिहरूले विधिको शासनअनुसार संविधानको रक्षा गर्दै देश निर्माणमा अघि बढ्नुपर्नेमा जोड दिए ।
उनले पोखरेलको पुस्तक पठनीय रहेको भन्दै इतिहासकार, राजनीतिज्ञ, पत्रकार, समाज निर्मातादेखि हरेकको लागि उत्तिकै महत्वपूर्ण रहेको धारणा राखे ।