विराटनगर । मोरङ क्षेत्र नं. ६ मा डा. शेखर कोइराला ले मौन अवधिको सुरु हुन केही घण्टा मात्र बाँकी रहँदा समेत आफ्ना मतदाता भेट्ने क्रम निरन्तर राखेका छन्।

घरदैलो, कोणसभा र व्यक्तिगत भेटघाटमार्फत उनी अन्तिम क्षणसम्म प्रत्यक्ष संवादमा सक्रिय देखिएका छन्।
कोइरालाका लागि यो केवल चुनाव जित्ने अवसर मात्र होइन। कोइराला परिवारको राजनीतिक विरासत जोगाउँदै राष्ट्रिय राजनीतिमा आफ्नो दरिलो उपस्थिति देखाउने अवसर पनि हो। उनी यसलाई सही रूपमा प्रयोग गर्दै मतदातासँग भरोसा कायम राखेका छन् र आफ्ना विचार, अनुभव र विकास एजेण्डा प्रत्यक्ष प्रस्तुत गरिरहेका छन्।

उनको अभियानमा आत्मसमालोचना, पारदर्शिता र स्पष्ट विकास योजना पनि जोडिएको छ। डा. कोइरालाले विगतमा अपेक्षाअनुसार काम हुन नसकेका विषयहरू स्वीकार गर्दै आगामी कार्यकालमा सुधार गर्ने प्रतिबद्धता जनाएका छन्।

विशेष कुरा, उनले आफ्नो अभियान जेनजी आन्दोलनका क्रममा जलेको कोइराला निवासलाई साक्षी बनाउँदै सञ्चालन गरिरहेका छन्। परिवारको इतिहास र राजनीतिक संघर्षको प्रतीक बनेको यो स्थानमा उनले मतदाता भेट्ने, स्थानीय समस्यामा प्रत्यक्ष सुनुवाइ गर्ने र आफ्नो योजनाहरु प्रस्तुत गर्ने क्रम जारी राखेका छन्। यसले अभियानमा भावनात्मक गहिराई थपेको मात्र होइन, समर्थक र मतदातामा भरोसाको भावना पनि बलियो बनाएको छ।

उनले स्थानीय मुद्दालाई केन्द्रमा राखेका छन्। उद्योग व्यवसायको पुनरुत्थान, रोजगारी सिर्जना, स्वास्थ्य,शिक्षा पूर्वाधार सुदृढीकरण र सहरी व्यवस्थापनमा जोड दिँदै उनले विराटनगरलाई पुनः राजनीतिक र आर्थिक केन्द्र बनाउने प्रतिबद्धता व्यक्त गरेका छन्।

चुनावी प्रतिस्पर्धा कडा छ। एकातिर एमालेका विनोद ढकाल र रास्वपाबाट रुबिना आचार्य प्रतिस्पर्धामा छन्। तर कोइरालाको स्वच्छ छवि, राष्ट्रिय राजनीतिक अनुभव र संगठनात्मक बलले आम कार्यकर्ता र मतदातामा आत्मविश्वास थपेको छ।

जेनजी युवाको सहभागिता अभियानको अर्को विशेषता हो। “जेनजीको आवाज आफ्नो पनि आवाज” भन्दै उनले युवालाई अन्तिम क्षणसम्म अभियानमा  संलग्न गराएका छन्। यसले मतदातामा उत्साह मात्र बढाएको छैन, अभियानमा नयाँ ऊर्जा थपेको छ।

विश्लेषकहरूले भन्छन्, कोइरालाको रणनीति तीन मुख्य आधारमा आधारित छ १.आत्मसमालोचना र पारदर्शिता
२.स्थानीय विकास एजेण्डा ३.राष्ट्रिय छवि र संगठनात्मक बल।

मोरङ ६ मा डा. कोइरालाको निर्वाचन केन्द्रीत  अभियानले मतदातामा भरोसा, सकारात्मक भावना र सक्रिय सहभागिता सिर्जना गरेको छ। अन्तिम क्षणसम्मको प्रत्यक्ष भेटघाट, युवालाई जोड्ने रणनीति, स्पष्ट विकास एजेण्डा र जलेको कोइराला निवासलाई साक्षी बनाएर सञ्चालन गरिएको अभियानले उनलाई बलियो प्रतिस्पर्धी बनाएको छ। चुनावको परिणाम कस्तो आउँछ भन्ने कुरा मतगणनापछि मात्रै स्पष्ट हुनेछ।