विराटनगर । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले भ्रष्टाचार विरोधी र सुशासनको अभियानलाई देशव्यापी बनाउने बताएका छन् ।

त्यसका लागि पार्टीले हुलाकी मार्ग केन्द्रित तराई–मधेश जागरण अभियान चलाएको उनको भनाइ छ । भ्रष्टाचार विरोधी र सुशासनको कुरालाई जनताबीचमा लगेर आर्थिक विकास एवं समृद्धिका निम्ति जनचेतना अभिवृद्धि गर्ने उद्देश्यले अभियान चलाइएको प्रचण्डले बताए । 

हुलाकी मार्ग केन्द्रित तराई–मधेश जागरण अभियानका क्रममा विराटनगरमा बुधबार बिहान आयोजित पत्रकार सम्मेलनमा बोल्दै उनले अहिलेको सरकार भ्रष्टाचारीलाई संरक्षण गर्ने उद्देश्यले बताएको आरोप दोहोर्याए । प्रचण्डले यो कुरा बारम्बार भनिरहेका छन् । 

आफ्नो सरकारले भ्रष्टाचारीलाई कारबाहीमा ल्याउने अभियान चलाएपछि उनीहरुलाई संरक्षण गर्न कांग्रेस–एमाले गठबन्धनको सरकार बनेको उनको दाबी छ । ‘हामीले सुशासन कायम गर्न खोज्यौं । भ्रष्टाचार विरोधी अभियान सुरु गरेबापत, भ्रष्टाचारीलाई कारबाहीको दायरामा ल्याउन थालेबापत भ्रष्टाचारीको संरक्षण गर्ने उद्देश्यले नै अहिलेको गठबन्धन सरकार बनेको हो’, प्रचण्डले भने । 

भ्रष्टाचार विरोधी अभियानलाई राष्ट्रव्यापी रुपमा जनताको बीचमा लैजान जागरण अभियान सुरु गरिएको उनको जिकिर छ । त्यसबाहेक अभियानको अर्को उद्देश्य दक्षिण भेगमा रहेका आदिवासी जनताति, मधेशी, थारुको मुद्दा स्थापित गर्नु र राष्ट्रिय एकता सुदृढ गर्नु नै रहेको प्रचण्डले बताए ।

माओवादीले सञ्चालन गरेको तराई–मधेश जागरण अभियानको बुधबार तेस्रो दिन हो । झापाबाट सुरु भएको अभियानको दोस्रो दिन माओवादीले मोरङमा खबरदारी एवं जनसभा गरेको थियो ।