विराटनगर। 
विराट मैथिल नाट्यकला परिषद्‌को आयोजनामा आज दिउँसो विराटनगर–१ स्थित स्वर संगम सङ्गीतालयमा भव्य बहुभाषिक कविगोष्ठी, परिचर्चा तथा सम्मान कार्यक्रम सम्पन्न भयो। करिब तीन घण्टासम्म चलेको उक्त कार्यक्रम साहित्य, संगीत र स्रजनशीलताको संगम बनेको थियो।

परिषद्का अध्यक्ष डोमी कामतको अध्यक्षता र प्राध्यापक कृष्णा पोखरेलको प्रमुख आतिथ्यमा सम्पन्न कार्यक्रममा करिब ६० जना साहित्यप्रेमी, स्रष्टा तथा समाजसेवीहरुको उपस्थिति रहेको थियो। कार्यक्रममा पोखराबाट आएका साहित्यकारहरूले समेत आफ्ना सृजनाहरू वाचन गर्दै बहुभाषिक भावनालाई समृद्ध बनाएका थिए।

कार्यक्रमका प्रमुख अतिथि प्रा. पोखरेलले नेपाली भाषासाहित्यमा मैथिली, नेपाली, भोजपुरी र अन्य भाषाबीचको सहकार्यले सांस्कृतिक एकता र सिर्जनाको शक्ति बढाउने विश्वास व्यक्त गरे। परिषद्का अध्यक्ष कामतले कार्यक्रमको उद्देश्य र परिषद्को आगामी योजनाबारे मन्तव्य राख्दै साहित्यिक मेलमिलापलाई निरन्तरता दिने प्रतिवद्धता जनाए।

पाँच विशिष्ट स्रष्टाहरू सम्मानित

कार्यक्रमको मुख्य आकर्षण सम्मान समारोह रह्यो, जसमा समाजका पाँच विशिष्ट स्रष्टाहरुलाई दोसल्ला र सम्मानपत्रद्वारा सम्मानित गरिएको थियो । उनीहरूका जीवनकथाहरू केवल परिचय थिएनन् — त्यो सृजनाको इतिहास, संघर्ष र समर्पणको प्रतिविम्ब थियो।

मधु पोखरेल, मुक्तक र गजलका अग्रज हस्ती, “अग्रज स्रष्टा सम्मान” बाट सम्मानित भए। उनका शब्दहरू सदैव मुक्तक, तर गहिरा छन् — जस्तै उनका गजलहरू। उनको परिचय वरिष्ठ साहित्यकार बाबुराम पोखरेलले सजीव स्वरमा प्रस्तुत गरे।

शिवनारायण पण्डित ‘सिङ्गल’, नेपाली र मैथिली रंगमञ्चका दुवै संसारमा समान रूपले क्रियाशील, अर्को “अग्रज स्रष्टा सम्मान”का पात्र बने। उनको जीवनी समालोचक हरिप्रसाद बरालले पाठ गर्दा, सभामा ताली  र श्रद्धा दुवै गुञ्जियो । 

डा. बालकृष्ण साह, चिकित्सक र साहित्यकार — शब्द र सेवा दुवै क्षेत्रमा समर्पित व्यक्तित्व। उनलाई “चिकित्सक स्रष्टा सेवा सम्मान” प्रदान गरियो। उनको जीवनयात्रा समालोचक तथा नेपाल लेखक संघका अध्यक्ष दिनेशराज सुवेदी ‘दिङ्लाली कान्छा’ले हृदयस्पर्शी ढंगले वाचन गरे।

श्रीमती मञ्जु घिमिरे दाहाल, लेखनमा संवेदना र समाजप्रति प्रतिबद्धता बोकेकी महिला स्रष्टा। उनी  “महिला स्रष्टा सम्मान”की सम्मानित पात्र रहिन्। उनको परिचय वरिष्ठ साहित्यकार लक्ष्मी खड्का रायमाझीले आत्मीयतापूर्वक प्रस्तुत गरिन्।

विजयकुमार राय, समाजसेवामा सक्रिय र सृजनामा समर्पित व्यक्तित्व, “सामाजिक स्रष्टा सम्मान”का प्राप्तकर्ता बने। उनको जीवनी साहित्यकार रञ्जना भट्टराईले भावनात्मक स्वरमा वाचन गरिन्।

सम्मानको क्षणमा दोसल्लाले ढाकिएका ती पाँच अनुहारहरूमा केवल खुशी थिएन, समर्पणको तेज झल्किएको थियाे ।

साहित्य र समाजबीचको सेतु

कार्यक्रममा वरिष्ठ साहित्यकार सरला चापागाईं, स्वर संगम सङ्गीतालयका संस्थापक कुशेस्वर राई, प्रज्ञा प्रतिष्ठानका प्रतिनिधिहरू लगायतका विशिष्ट व्यक्तित्वहरूको उपस्थितिले समारोहलाई अझ भव्य बनाएको थियो।

साहित्य, संगीत र समाजबीचको समन्वयको सुन्दर उदाहरण बनेको यस कार्यक्रमले बहुभाषिक सृजनाको यात्रा अझ सशक्त दिशामा अघि बढाएको अनुभूति सहभागीहरूले व्यक्त गरेका थिए।