विराटनगर : विराटनगरलाई कर्मथलो बनाएर अन्तर्राष्ट्रिय क्षेत्र सम्म नेपाललाई चिनाउन योगदान दिएका समाज सेवी सन्तोष रिजालको निधन भएको छ । उनले कहिल्यै ठूलो चर्चा खोजेनन्, तर जहाँ पुगे त्यहाँ जिम्मेवारीको छाप छोडेर गए । विराटनगरका यी समाजसेवी तथा व्यवसायीको निधनसँगै एउटा यस्तो व्यक्तित्वको अन्त्य भएको छ, जसको उपस्थिति शब्दभन्दा बढी कामले महसुस हुन्थ्यो।

उनको २०८३ साल बैशाख १९ गते शनिबार काठमाडौंस्थित हेम्स अस्पतालमा उपचारका क्रममा निधन भयो। खबर सार्वजनिक भएपछि विराटनगरको सामाजिक र युवा वृत्त स्तब्ध बनेको छ भने देशब्यापी रुपमा उनलाई चिन्नेहरुको श्रद्धाञ्जलीका शब्दहरुले सामाजिक संजाल भरिएको छ ।

रिजाल नेतृत्वका पदमा रहेर पनि आफूलाई त्यहाँ मात्र सीमित राखेनन्। उनले विराटनगर जेसीज वर्ष १९८७ का अध्यक्षका रूपमा स्थानीय स्तरमा नेतृत्वको अभ्यास गरे भने नेपाल जेसीजको राष्ट्रिय अध्यक्षको जिम्मेवारी सम्हाल्दै देशभर युवा नेतृत्व विकासमा योगदान दिए।

उनको प्रभाव राष्ट्रिय सीमामा मात्र रोकिएन। अन्तर्राष्ट्रिय जेसीजमा सन् १९९८ मा कार्यकारिणी उपाध्यक्षका रूपमा नेपाललाई प्रतिनिधित्व गर्दै उनले अन्तर्राष्ट्रिय मञ्चमा पनि आफ्नो उपस्थिति दर्ज गराए। जुन जेसीजमा हाल सम्म कुनै नेपालीले प्राप्त गरेको सबैभन्दा ठूलो पद हो ।

 त्यस्तै रोटरी इन्टरनेशनलमा नेपाल र भुटान अन्तर्गतका क्लबहरुको गभर्नरका रूपमा उनले सामाजिक सेवाको अभियानलाई अझ व्यवस्थित र विस्तृत बनाउन भूमिका खेले।

उनलाई नजिक बाट चिन्ने विराटनगरवासीका अनुसार रिजालले आफूलाई कहिल्यै केन्द्रमा राखेनन्, तर कामहरूलाई केन्द्रमा राखे। औपचारिक भाषणभन्दा व्यवहारमा विश्वास गर्ने उनको शैलीले धेरै युवाहरूलाई नेतृत्व र सेवातर्फ आकर्षित गरेको थियो।

उनको निधनसँगै विराटनगरले एक यस्तो व्यक्तित्व गुमाएको छ, जसले पद होइन, जिम्मेवारी बोकेर काम गर्थे। अहिले उनलाई सम्झिनेहरूका लागि उनी केवल पदाधिकारी होइनन्, मौन रूपमा समाज बदल्ने एउटा अभ्यासकर्ताका रुपमा थिए ।

समाजसेवी रिजाल भौतिक रुपमा हामी माझ नरहे पनि उनले छोडेको शान्त नेतृत्व, अनुशासन र सेवाको बाटोमा लाग्नुपर्छ भन्ने उनको सोचले अनन्तकालसम्म उनको स्मरण गराइ राख्ने छ । अखवारका कुराको तर्फबाट रिजाल प्रति भावपुर्ण श्रद्धाञ्जली ।