काठमाडौं । नेपाली जनता दलले आसन्न प्रतिनिधिसभा सदस्य निर्वाचनलाई लक्षित गर्दै आफ्नो संक्षिप्त घोषणा पत्र सार्वजनिक गरेको छ ।
सोमबार काठमाडौंस्थित केन्द्रीय कार्यालयमा आयोजित पत्रकार सम्मेलनमार्फत पार्टीले राष्ट्रियताको रक्षा, लोकतन्त्रको सुदृढीकरण, भ्रष्टाचार र बेरोजगारी अन्त्यलाई प्रमुख एजेण्डा बनाएको जनाएको हो ।

पार्टीका कार्यकारी अध्यक्ष नवराज सुवेदीले जेनजी आन्दोलनलगायत विभिन्न राजनीतिक आन्दोलनमा ज्यान गुमाएका सहिदहरूप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरे । उनले सात दशक लामो राजनीतिक संघर्षबाट प्राप्त उपलब्धिको रक्षा गर्दै मुलुकलाई शान्ति, सुशासन र समृद्धिको मार्गमा अघि बढाउन नयाँ वैचारिक हस्तक्षेप आवश्यक रहेको बताए ।

विसं २०५१ सालमा स्थापना भएको नेपाली जनता दल र २०८२ सालमा स्थापना भएको जनयुग पार्टीबीच गत मंसिर ६ गते एकता भएपछि संयुक्त रूपमा नेपाली जनता दल गठन गरिएको जानकारी दिइयो । पार्टीले उक्त एकतालाई परम्परागत राजनीतिमा वैचारिक बदलाव र सामाजिक–सांस्कृतिक क्षेत्रमा नवचेतना ल्याउने कदमका रूपमा व्याख्या गरेको छ ।

पार्टीले प्रकृतिवाद, वैज्ञानिक मानवतावाद र मौलिक समाजवादलाई मार्गदर्शक सिद्धान्तका रूपमा अघि सारेको छ । नागरिक स्वतन्त्रता, समानता, सामाजिक न्याय, उद्यमशीलता प्रवद्र्धन र आत्मनिर्भर अर्थतन्त्र निर्माणलाई प्राथमिकतामा राखिएको छ । साथै मानव, प्राणी जगत र वातावरण संरक्षणसहित नेपाली सभ्यताको विकासलाई पनि लक्ष्य बनाइएको जनाएको छ ।

जेनजी आन्दोलनपछि मुलुकमा नेतृत्व पुस्तान्तरणको बहस उठिरहेको सन्दर्भमा पार्टीले ‘नयाँ’ को अर्थ केवल उमेरसँग नजोडी विचार, दृष्टिकोण र आचरणमा समेत परिवर्तन हुनुपर्ने धारणा राखेको छ । हाल सुशीला कार्की नेतृत्वको अन्तरिम सरकार क्रियाशील रहेको उल्लेख गर्दै पार्टीले निष्पक्ष छानबिन र स्वच्छ निर्वाचनमार्फत संविधानलाई सही मार्गमा ल्याउनुपर्ने आवश्यकता औंल्याएको छ । नेपालको संविधान २०७२ कार्यान्वयनका क्रममा देखिएका त्रुटि सच्याउन आवश्यक संशोधन गरिनुपर्ने धारणा पनि पार्टीको छ ।

निर्वाचन तयारीबारे जानकारी दिँदै पार्टीले प्रतिनिधिसभाको समानुपातिकतर्फ ४७ जना उम्मेदवार उठाएको र प्रत्यक्षतर्फ कोशी, मधेश र लुम्बिनी प्रदेशका पाँच निर्वाचन क्षेत्रमा उम्मेदवार खडा गरेको जनाएको छ ।