विराटनगर । बाढीले घर बगायो, जीवनको आधार भत्कायो। विपदमा परेका त्यस्ता परिवारको पीडामा मल्हम लगाउन आरोहण गुरुकुल विराटनगर रंगमञ्चमार्फत अघि बढेको छ। गुरुकुलले नाटकलाई मनोरञ्जनको माध्यममा मात्र सीमित नराखी त्यसलाई मानवीय सहयोगको अभियानमा जोडेको हो।

रसुवाको भोटेकोशी नदी तथा तल्लो तटीय क्षेत्रमा भदौ १० गते आएको भीषण तथा विनाशकारी बाढीबाट प्रभावितका लागि आर्थिक सहयोग जुटाउने उद्देश्यले आरोहण गुरुकुलले भदौ २१ देखि २४ गतेसम्म ‘सिफारिस’ नाटक मञ्चन गरेको थियो। विद्यालय, कलेज, संस्था तथा समूहका लागि भदौ २५ र २६ गतेसमेत विशेष प्रदर्शन गरिएको थियो।

नाटक हेर्न पुगेका दर्शकका लागि त्यो केवल एउटा रंगमञ्चीय प्रस्तुति बनेन। बाढीले सर्वस्व गुमाएका परिवारको पीडामा आफ्नो तर्फबाट केही योगदान गर्ने अवसर पनि बन्यो। दर्शक, विद्यालय, कलेज, संस्था तथा विभिन्न समूहबाट प्राप्त सहयोगले अभियानलाई सार्थक बनाएको गुरुकुलले जनाएको छ।

नाटक मञ्चनबाट संकलित १४१२०० रुपैयाँ नेपाल सरकारको आधिकारिक विपद् उद्धार तथा राहत कोषमा जम्मा गरिने आरोहण गुरुकुलले जनाएको छ। रकम जम्मा गरेपछि त्यसको जानकारीसमेत सार्वजनिक गरिने गुरुकुलको भनाइ छ।

अभियानमा साथ दिने सञ्चारकर्मी, मिडिया, कन्टेन्ट क्रिएटर, सामाजिक अभियन्ता, समाजसेवी तथा प्रत्यक्ष–परोक्ष सहयोग गर्ने सबैप्रति आरोहण गुरुकुलले आभार व्यक्त गरेको छ।

रंगमञ्चमा कलाकारले नाटक देखाए, दर्शकले नाटक हेरे। तर अन्ततः त्यो कथा रंगमञ्चमै रोकिएन। बाढीपीडितको पीडासम्म पुग्ने सहयोगमा बदलियो।

विपद्को बेला सहयोग गर्न सधैं ठूलो सामर्थ्य आवश्यक पर्दैन। आफ्नो ठाउँबाट गरिने सानो प्रयास पनि कसैका लागि ठूलो सहारा बन्न सक्छ। ‘सिफारिस’को मञ्चनले यही मानवीय सन्देश दिएको छ।

आरोहण गुरुकुलको यो अभियानले कला र सामाजिक उत्तरदायित्वबीचको सम्बन्धलाई पनि उजागर गरेको छ । मञ्चमा उठेको आवाज अब विपद् प्रभावितको जीवनमा सहयोग बनेर पुग्नेछ।