विराटनगर,  विराट राजवंशी समाज उत्थान समितिले आगामी फागुन ६ गते विराटनगरको महेन्द्र चोक (हिमालय रोड) मा १८औं बृहत भेला तथा ¥यालीको आयोजना गर्ने भएको छ। समितिले  पत्रकार सम्मेलन गर्दै सो जानकारी दिएको हो।

समितिका संयोजक वसन्त (बनेश नाल) राजवंशीका अनुसार भेलाको उद्देश्य विराट राजवंशी समुदायलाई आदिवासी जनजाति उत्थान राष्ट्रिय प्रतिष्ठानमा सूचिकृत गराउन सरकारलाई दवाव दिनु रहेको छ। समितिले विभिन्न सातवटा मुख्य माग राख्दै, यदि सरकारलाई सम्बोधन नगरे थप सशक्त आन्दोलन गर्ने चेतावनी दिएको छ।

समितिले राखेका प्रमुख मागहरू:

1. विराट राजवंशीलाई आदिवासी जनजाति उत्थान राष्ट्रिय प्रतिष्ठानमा सूचिकृत गर्नुपर्ने।

2. राज्यका हरेक क्षेत्रमा विराट राजवंशीको प्रतिनिधित्व सुनिश्चित गर्नुपर्ने।

3. कोशी प्रदेशसभामा मूल आदिवासीका रूपमा समानुपातिक सहभागिता दिनुपर्ने।

4. विराटनगरको प्रथम जातिको रूपमा विराट राजवंशीलाई आधिकारिक रूपमा घोषणा गर्नुपर्ने।

5. विराट राजवंशी समुदायका लागि छुट्टै आरक्षणको व्यवस्था गर्नुपर्ने।

6. विराटनगर महानगरसहित राजवंशीको बाहुल्य क्षेत्रलाई स्वायत्त परिषद्का रूपमा विकास गर्नुपर्ने।

7. भेडियारीस्थित विराट दरबार क्षेत्रको संरक्षण र प्रवर्द्धन गर्दै पर्यटन गन्तव्यका रूपमा विकास गर्नुपर्ने।

आन्दोलनका चरणहरू:
समितिले माग सम्बोधन नभए आगामी वैशाखदेखि अनशन, सिटी जुलुस, चक्काजाम तथा विराटनगर प्रवेश निषेधजस्ता संघर्षका कार्यक्रम अघि बढाउने चेतावनी दिएको छ।

यसअघि, फागुन ३ गते बिहान १०:३० बजे विराटनगरमा मोटरसाइकल ¥याली निकालिने कार्यक्रम तय भएको छ भने बृहत भेलाको कार्यक्रम फागुन ६ गते बिहान १०:३० बजे संसारी माईस्थानमा सुरु भई महेन्द्र चोकमा सम्पन्न हुने बताइएको छ।

१८औं वृहत भेलाको सह सयोजक राजेश कुमार राजवंशी ले गर्ने छ्न।समितिका अध्यक्ष भुवनेश्वर मण्डल राजवंशीले विराट राजवंशी समुदायको अस्तित्व, पहिचान र अधिकारका लागि पत्रकार तथा सम्पूर्ण नागरिक समाजको समर्थन आवश्यक रहेको बताए।