बिराटनगर / पौष १६ 

पुसकाे दाेस्राे हप्ता पछि  चिसाे बढेकाे छ । जाडोयाम तुलनात्मक रुपमा गर्भवती महिलाभन्दा सुत्केरी महिलाका लागि बढि गार्‍हो हुने हुन्छ ।  सुत्केरी महिलाले आफूसँगै नवजात शिशुको पनि हेरचाह गर्नुपर्ने हुन्छ ।

जाडो मौसममा अन्य व्यक्तिलाई झैं गर्भवती महिलालाई पनि छालाको समस्या, जननेन्द्रियको समस्या, पिसाबको समस्या, श्वासप्रश्वासको समस्या लगायत समस्या देखिन्छन् । 

 जाडोयाममा गर्भवती महिलामा ओठ, मुख, हात, खुट्टा, कुर्कुच्चा फुट्ने समस्या पनि धेरै देखिन्छ । साथै ओठमुख सुक्खा, रातो र सुन्निएको देखिने तथा पहेंलो र फुस्रो देखिन सक्छ । जाडोयाममा हावा सुक्खा हुने भएकाले यस्तो समस्या आउने हुन्छ । पेट्रोलियम जेलीयुक्त बाम, चिपस्टिक, ग्लिसरिन, भ्यासलिन लगाउने गरेमा यो समस्याको निराकरण हुन्छ । 

जाडो मौसममा तुलनात्मक रुपमा कम नुहाइन्छ । शारीरिक सरसफाइमा कमी भयो भने यौनाङ्ग वरिपरि चिलाउने, यौनाङ्ग वरिपरि भागको संक्रमण तथा सुजन हुने हुनसक्छ । सरसफाइकाे कमिले ट्राइकोमोनास, क्यान्डिडा, (फङ्गस), भाइरस, जुम्रा तथा चुर्ना आदिकाे संक्रमण हुन सक्छ । यसबाट बच्न खुकुलो खालको सुति (कटन) का बाट  भित्री कपडा  लगाउने र याैनअङ्गकाे सरसफाइमा बिशेष ध्यान पुर्‍याउनु पर्छ । तर संक्रमण भई हाले चिकित्सककाे परामर्श लिएर औषधोपचार गर्न ढिला गर्नु हुदैन । 

चिसोपन, शुष्कता एवं आगो, धुवाँ तथा प्रदूषणको कारणले गर्भवती महिलामा पनि श्वासप्रश्वासको समस्या र रुघाखोकीको समस्या बढ्न सक्छ । श्वासप्रश्वास सम्बन्धी समस्या अन्तर्गत दम, ब्रोङ्काइटिस र निमोनिया पर्छन् । विशेषगरी जाडोयाममा श्वासनली साँघुरिंदै गएर सास फेर्न गाह्रो हुने हुन्छ । चिसोपनले हुने एलर्जी, न्यानो पार्नका आगो ताप्ने क्रममा आउने धुवाँ र चुरोटको अत्यधिक सेवनले श्वासप्रश्वास सम्बन्धी समस्यालाई बल्झाउँछ ।

 त्यसैले गर्भवती तथा सुत्केरीहरुले धुवाँ, धुलाे र चिसाेबाट टाढा बस्नु पर्छ  र समस्या भए  चिकित्सकको सल्लाह बमोजिम श्वासनली फुक्ने औषधिहरु तथा एन्टिबायोटिककाे पनि सेवन गर्नुपर्ने हुन्छ ।